Mentres o Apalpador percorre Galiza agasalhando os nenos e nenas nestas datas de fim de ano, o Galiza Pulgas Circus repartiu ilusom na Casa da Cultura Manuel Lueiro do Grove.
Claudio Carruselo, Lilith, Esmeralda e Breogán enviam um saúdo desde a pista central do menor espectáculo do mundo!
Breogán voltou á terra que o viu nascer entre os pelos dum jabali.
Soldóm da Seara, umha aldeínha da Volta Grande do Courel, acolheu as pulgas do Galiza Pulgas Circus e Claudio Carruselo e a gentinha pequena compartirom uns grandes momentos no alpendre de Amadeu.
Famosa polas suas malas pulgas, -a aldea padece umha praga crónica de pulgas de cabra desde hai vários anos- Soldóm recebeu a Lilith, Esmeralda e Breogán com os braços abertos e um grande sorriso.
Mesmo a gente alérgica ás trabadas das pulgas puido comprobar que nom todas as pulgas som iguais e que as pulgas do Circo Carruselo som grandes artistas e umhas profisionais.
Umha aperta, gente do Courel.
E desde aqui tamem berramos: Courel, Parque Natural Já!
Acavam de chegar-nos várias fotos do Galiza Pulgas Circus no Festival Internacional de Títeres Galicreques, de Santiago de Compostela.
Como dixemos no seu momento, -mais abaixo- foi toda umha honra para a família Carruselo ter participado deste espaço para a fantasia compatindo festival com grandes artistas do mundo, gente á que lhe brilham os olhos quando o público se emociona e vive a vida do marabilhoso mundo da ilusiom.
Ademais, as fotos som tam bonitas... Lástima nom saber o nome d@ fotógraf@ para lhe dar os parabéns!
-Vivam os monicreques e as pulgas!
-Vivaaaaaammmm!!!
Aí está Claudio Carruselo, no Pazo de Tor, na gira que no Dia dos Museus o Galiza Pulgas Circus realizou pola província de Lugo de museu em museu!
O Paço de Tor é um edifício com um toque barroco do século XVIII que está cheio de veludo vermelho, cerámica de Sargadelos, armas do ano catapum, sérios retratos de senhoras e senhoros serios e, talvez, algumha pantasma...
Dona María de la Paz Taboada de Andrés y Zúñiga, essa senhora de branco riso cegador, foi a sua última propietária, antes de que o Paço passa-se ao domínio público.
Um lugar idóneo para abrir á gente da aldea de Tor e do resto do mundo e apressentar um domingo qualquer um espectáculo de Circo de Pulgas!
As pulgas entraron nos museus!
Ahá, Claudio Carruselo, Lilith, Esmeralda e Breogán actuarom em quatro museus cheos de mistério, tesouros, cultura e nenos e nenas.
Estas fotos som do espectáculo na Fortaleza em Sam Paio de Narla, Friol, um castelo medieval inzado de mistério, tesouros e no que, como podedes ver á direita, numha sala de armas, nom faltava um boneco vestido de samurai do império nipóm!
Por certo, que bem falam galego os nenos e as nenas de Friol!
Claudio Carruselo tamém fixo estremecer o público no Museu do Mar em Sam Cibrao, entre escafandras, cunchas de argonauta e barbas de balea; no Paço de Tor, em Monforte, um paço do século XVIII com lámpadas gigantescas de bágoas de cristal, espingardas, joias de todas as cores, sofás de veludo vermelho e o retrato dumha senhora mui guapa que se chamava Teresa; e mais no Museu Provincial de Lugo, ao carom de esculturas e pinturas d@s grandes artistas galeg at s.
As pulgas agradecerom muito esta viaxe ilustrada pola nossa cultura!
E descubrirom cousas marabilhosas que só se podem atopar dentro dos museus.
Ademais, encanta-lhes conhecer país!
Breogán, a pulga que naceu no lombo dun xabarín, voltou á casa, ao pé do Courel!
E que melhor ocasión para facelo que cunha actuación nun Festival para recadar fondos para restaurar a escola de Soldón da Seara?
Foi bonito.
No palco da música do campo da Hermida, o Circo de Pulgas Carruselo, com um paracaídas de cores de fondo e unhas gaitas como música ambiental, volveu ilusionar os ollos das nenas e nenos que aplaudiron as pulgas mais frikis da Galiza.
Os nenos e nenas do Grove aplaudiron forte forte as tres pulgas recén chegadas da súa viaxe internacional.
E deron un chimpo das luces e músicas do circo da televisión á luz da biblioteca do cole do Grove que, pertiño da praia da Lanzada, -onde as pulgas de mar agardan ansiosas o verán- acolleu com moito cariño a Mimí, Esmeralda e Breogán.
Saúdos!
Claudio Carruselo foi un dos "personaxes ocultos" no programa concurso español Identity, ao que acudiu coas súas tres pulgas, Mimí, Esmeralda e Breogán.
Aqui podemos observar a elegancia sen par do domador, cun chaleque que chamou a atención de vários millóns de espectadores polo seu brillo cegador. Se nos fixamos ben, ao lado esquerdo do micrófono pódese chegar a ver a pulga Breogán.
Foron case doce horas de gravación no plató. E unha experiencia un tanto extraterrestre -non fai falla máis que mirar a forma de nave espacial do estudo.
Ante a pregunta "Ten circo de pulgas", o concursante non fallou: "É o personaxe número 10". Un domador de pulgas coñécese a primeira vista por dentro e por fóra! E a ollada de Claudio Carruselo -acostumada a tratar con feras salvaxes- é como un libro aberto!
Traballou en dez países? Levantou unha ponte? Aprende a bailar? Fala do revés?Fixo táboas co campión do mundo de xadrez? Vendeu 70.000 copias?
Non: o domador de pulgas é o señor de barba!
Ten pinta a rapaza de vermello de domar pulgas?
Talvez a de vestido negro?
Non, o domador de pulgas é o grande Claudio -que por outro lado viaxou co Circo Carruselo por moitos máis países dos que podemos contar cos dedos das mans e dos pés-
Mas o que Claudio Carruselo descubriu nesta aventura nun concurso de televisión é un segredo que o Galiza Pulgas Circus nunca revelará...
Un saúdo!
Um livro de banda desenhada mui recomendável...
... com pulgas que invadem o coraçom da gente e fam muito mais que actuar num circo...
... de Fermin Solís
Delicado, com emoçons grandes como baleas e marabilhas pequenas como pulgas.
Tres urras por Fermín!!!
Hip, hip... urra!
Hip, hip... urra!!
Hip, hip... urra!!!
Chámase Candela Carruselo, ten sete anos e vive con tres pulgas en Vigo. Seu pai é o famoso Claudio Carruselo, domador do Galiza Pulgas Circus e ela vai camiño de se converter na domadora de pulgas máis pequena do mundo!
- Candela, como é a vida cun domador de pulgas?
- A comida das pulgas é o sangue, e as nosas pulgas case sempre se alimentan do meu. Papá ponme as pulgas de noite e pícanme.
- Doe?
- Non, non, nin te das conta!
-Cantas pulgas viven con vós?
- Tres: Mimí, Esmeralda e Breogán. Mimí é a miña preferida. É travesa e gústame. Xoga ao fútbol, sube por unha rampa...
- Como é a vida dun domador de pulgas?
- Adestra moito. Adestra moitas horas á semana.
- E como consegue un domador as súas pulgas?
- Papá foi buscalas ao monte. Unha tróuxoa dun xabarín do Courel. Logo adestrounas moito tempo, cinco anos.
- E gustaríache seguir a tradición da familia Carruselo?
- Gustaría. Fáltame crecer. Xa fixen unha proba un día, con Mimí. Díxenlle que subise pola rampa e subiu. Mimí, sube! Teño que aprender a mandarlle as cousas mellor.
- Cando vas estar preparada?
- Cando teña máis tempo. Aínda son pequena. E ademais, cando me poña a falar en galego. Tamén quero aprender inglés, francés, ruso, xaponés, grego e árabe para facer o espectáculo en máis lugares do mundo.
- Que che gustaría aportar ao Galiza Pulgas Circus?
- Eu poríalle unha colchoneta, corda e dar tres saltos e saltar á corda frouxa.
- Onde che gustaría viaxar?
- Gustaríame actuar en Barcelona, en Asturias e en París, na praza maior.
- Soñas coas pulgas?
- Si, soño que xa son domadora.
- E por que che gustaría ser domadora de pulgas?
- Porque quero divertir o público, porque ao público lle gusta o circo de pulgas, e porque vou ser a primeira domadora de pulgas.
- Que ten de especial un circo de pulgas?
- É máis pequeno, máis bonito, e as pulgas son máis impresionantes que os elefantes e máis difíciles de domesticar.
- A quen admiras?
- Admiro a Claudio Carruselo, a Querignac... Gustaríame coñecer a Pippi, vivir cunha tartaruga, ter un gato ao que lle aprendería a transportar pulgas... Gústame tocar o clarinete.
- Queres contar algunha anécdota en especial?
- Mimí un día escapou pola cociña adiante, e papá enfadouse con ela e colleuna tirándose ao chan. Agora vailles facer unha casa. Viven nunha caixiña, nun bolsiño, e nunha caravana pequeniña. Eu voulles facer un sofá cosendo.
O Circo de Pulgas Carruselo súmase á campaña de denuncia do animalicidio nas nosas estradas.
No Galiza Pulgas Circus, amantes da natureza e ecoloxistas de raíz, os domadores e as pulgas tamém berramos: Salvemos os ouriços cacho! Save the cacho´s ouriços!
Stop aos atropelos de animaliños nas estradas!
A principal intención que teñen as pulgas do Circo Carruselo cando espertan é marabillar a nenos e nenas, pois saben que marabillar a un pequeno é introducilo ao mundo do coñecemento.
Mieke e Chris Geris, son uns Flamencos de Flandes: feiticeiros capaces de transformar un anaco de madeira nun espectacular monicreque bailarín, que ao ritmo de gaita, zanfoña, frauta ou tamboril sacan aos espectadores da súa realidade.
A inspiración do dúo está na música, danzas e traxes tradicionais flamencos. «As óperas que facían Haydn e Mozart, como Don Giovanni, se representaban tamén con monicreques», argumenta Chris en defensa das súas marionetas bailarinas, citando tamén a Chopin, que compuxo música para monicreques.
Chris e Mieke fabrican as súas marionetas pero, a diferencia das escolas que ensinan a manexar monicreques feitos con materiais sintéticos, eles só utilizan madeira e materiais naturais. A zanfona que toca Mieke e as marionetas de fíos e madeira que Chris manipula, marcando co seu claqueteo o ritmo musical, adáptanse perfectamente.
GALICREQUES 2007: O DOMADOR CONVERTEUSE EN PULGA.
O adulto que capta dun xeito máis ou menos real o verdadeiro sentido dun monicreque ou dunha marioneta é un privilexiado. A nena, o neno, grazas ao seu espírito de identificación capta ese sentido coa maior naturalidade do mundo. O cativo, a cativa, non ve un boneco, non ve un anaco de madeira, senón que percibe que o monicreque ten unha vida autónoma da titiriteira ou titiriteiro.
As pulgas do Circo Carruselo son como os espíritos elementais inmortais que só son percibidos pola infancia máis sinxela. Cando un neno sente a Lili, Esmeralda ou Breogán entre o dedo furabolos e o gordo, e ve ás nosas pulgas como algo intelixente, pensamos nelas como monicreques invisibles.
Esta semana, entre mestres como Pepe Ruiz, Mieke e Chris (Plansjet) ou o ruso Víctor Antonov, entre outros e outras; as Carruselo, os Carruselo, sentímonos pulgas minúsculas. Agradecemos á Asociación Cultural Barriga Verde e aos patrocinadores de Galicreques 2007 que nos proporcionasen ese sentimento.
Un brinde polos titiriteiros e titiriteiras.
Pois, si, e queremos convidar-vos a viver com nós um espectáculo realmente pouco frecuente: um circo de pulgas.
O Circo de Pulgas Carruselo herdou da sua família o segredo da doma das pulgas selvagens e, com muita paciéncia, horas de trabalho e dotes de convicçom, conseguiu domar á pulga Lilith, -a pulga forzuda-, a Esmeralda, -virtuosa do piano- e a Breogán -a pulga bala.
Assi que já sabedes:
GALIZA PULGAS CIRCUS, Um espectáculo para ver com lupa!
Este sábado 6 de outubro ás 12.00, no Centro Sociocultural do Ensanche.
Direcçom: Familia Carruselo.
Domador: Claudio Carruselo.
Guiom: Séchu Sende
O vindeiro sábado día 22 de setembro, as 5:00 PM, na SALA NASA, de Compostela (rúa San Lourenzo, 51-53 B), as nosas tres pulgas do Circo dos e das Carruselo, porán de novo ao límite as súas posibilidades físicas e psíquicas, e non co ánimo de embarcarse nalgunha misión espacial, senon para mostrar as nenas e nenos as súas espectaculares habilidades.
Esmeralda, Breogán e Mimí, celebrarán, cunha morea de artistas, os quince anos de vida da SALA NASA, vital proxecto de participación social que desde o 1992 é unha porta aberta a creación, ao encontro de artistas e espectadores, un modelo alternativo de xestión cultural, liderado por artistas, sen ánimo de lucro, un centro de recursos artísticos independiente, flexible e accesible a artistas novos e consagrados.
SESIÓN DE TARDE PARA TODOS OS PÚBLICOS con: Paula Carballeira, O Circo de Pulgas Carruselo, Berrobambán, Sol Felloza, Manu Lago, Kukas, Santi Prego.
Pois si: as pulgas pedirom-nos um Museu fotográfico e o Galiza Pulgas Circus motou-lhes umha galeria no ciberespazo.
Zosca-lhe aqui!
Move-te com as frechas do teclado e boa viagem!
As pulgas do Circo Carruselo, Mimí, Esmeralda e Breogán, quixeron estar no Courel, na aldea de Froxán, o día da Festa Revolta.
Aquí están as fotos que tirou a nosa colaboradora infatigábel Rocío da Barqueira, no pendello de Evaristo e Helena, cheíño de nenos e nenas e outras especies.
No nome das pulgas do Courel, Breogán, -a pulga que naceu nun xabarín da aldea de Soldón-, tamén reclamou protección: Parque Natural xa!
Viva o Courel livre de Canteiras!
En apoio de SOS Courel, e contra a destrución dun dos espazos naturais mais valiosos do noso país, e polo desenvolvemento sustentábel da Serra do Courel como Parque Natural, o Circo de Pulgas Carruselo acudirá á Festa Revolta que vários colectivos sociais están a organizar para o sábado, 11 de agosto, en Froxán.
Breogán, a pulga bala, que naceu no lombo dun xabarín perto da aldea de Soldón da Seara, volta a casa.
Agardámosvos entre os castiñeiros!
Máis información aquí
Un texto de Made in Galiza, de Séchu Sende, en exclusiva para o Circo de Pulgas Carruselo!
Clica aquí: http://www.blogoteca.com/madeingaliza/index.php?cod=18326
Como non, o Circo de Pulgas Carruselo distínguese por apoiar, ademais do espectáculo da doma de animais salvaxes, a arte e a cultura. Entendemos que o Galiza Pulgas Circus é un deses pequenos patrimonios culturais de Galiza para o mundo e por iso onte, e entre outras cousas porque nos tocaba na familia, participamos na presentación dun libro na Feira do Libro de Vigo.
En fin. Foi espectacular.
Sabiamos que a xente que vai a unha feira do libro é xente valente, afoutada e destemida, porque a maioría das persoas lle teñen medo aos libros e non queren achegarse demasiado ás Feiras, onde hai milleiros de libros ceibos.
E sabiamos que a presentación dun libro é unha cousa seria, polo que pactamos co autor de Made in Galiza, o libro apresentado, que se quería contar coa nosa presencia non nos podía limitar o número de gargalladas, bravos e aplausos no noso espectáculo. Aceptou.
Así que sabendo todo iso e algunha cousa máis, o Galiza Pulgas Circus foi un bo primeiro prato no espectáculo da presentación do Made in Galiza, un libro que non podedes nin imaxinar.
Presentaron o libro, ademais do autor, o editor Carlos Lema, da editorial Galaxia, e mais o filósofo rock Carlos Santiago, ese fenómeno cultural da guerrilla comunicativa moderna.
Séchu Sende, o autor, sorprendeu explicando o seu Método de hipnose para falar galego, e o Estudo Sociolingüístico da Mocidade baixo os efectos das drogas, e confesando que el comezou a falar galego na mocidade logo de facer ouigha co espírito de Castelao.
En fin, todo foi un pouco sobrenatural. Como nun soño. Ou algo así.
E para remate do curso escolar, a semana passada o Circo de Pulgas Carruselo actuou en Vigo para máis de trinta rapaces e rapazas do cole de Frián.
Um globo aerostático que ascendeu polos aires em direcçom a Paris levou a Mimi, Esmeralda e Breogán entre as nubes, para passarem uns dias de merecido descanso.
Estamos aguardando as fotos do espectáculo... Que chegaram aginha!
Séchu Sende, coñecido amante das pulgas e autor do texto clásico no mundo da psicoentomoloxía "Como domar unha pulga", explica que este é un libro que procura a fórmula da liberdade na punta da lingua. Un libro de historias orixinais como cada unha das persoas e dos pobos que coñecemos ou soñamos: únicos. Un libro que conta contigo para ler o mundo con palabras que tamén son túas. Un libro difícil de soñar, como a vida mesma. Contraditorio, inocente, emocionante, creativo, rebelde: un libro Made in Galiza.
Ficades tod@s convidad@s!!!!
O Circo de Pulgas Carruselo quere solidarizarse cos nenos, nenas e profes do cole Brea Segade de Rianxo, vítimas dunha das peores calamidades que se poden padecer: unha praga de pulgas.
A xente do Circo sabemos moi ben que nada se pode comparar cun andazo de pulgas. Os tigres, os leóns, os elefantes, as panteras ou os crocodrilos cos que os domadores de todo o mundo traballan a diario, arriscando a vida nas pistas dos circos, non son nada en comparación co perigo que supón o ataque das pulgas en estado salvaxe.
Por iso os domadores do Circo de Pulgas Carruselo comprendemos moi ben a denuncia e a chamada de auxilio lanzada por nais e profes do cole de Taragoña diante desta vergonzosa situación que, por suposto, ten responsabeis, -alén das pulgas, pobres animais que non teñen culpa de ser como son.
O Circo de Pulgas Carruselo manifesta a súa denuncia solidaria cos nenos e nenas de Taragoña e reclama ás autoridades competentes e responsables políticos, -aos que sinalamos co noso látego- unha solución inmediata ao problema.
Isto é unha vergoña! Pulgas nun colexio!
Así mesmo, tanto os domadores Claudio e Séchu Carruselo, como as pulgas do noso circo, Lilith, Esmeralda e Breogán, sentimos que unha vez máis a pulga apareza nos medios de comunicación só cando ten lugar unha desgraza deste tipo como un animal feroz e sedento de sangue. Por favor, a xente ten que ser sensible e saber que a realidade é máis complexa: NON TODAS AS PULGAS SON IGUAIS.
No Circo de Pulgas Carruselo sabemos que as pulgas tamén poden ser animais sensibles e encantadores, e por iso o noso Circo quere lembrar o seu labor social como espectáculo que fomenta o amor polos animais.
